ബാറ്റും ബോളും പിന്നെ ഞാനും..

      ഞാന്‍ പുറകോട്ടു ഒന്ന് തിരിഞ്ഞു നോക്കി.  ഇത് കെ.എസ്.ആര്‍.ടി സി.യിലല്ല കേട്ടോ.. എന്റെ ജീവിതത്തിലേക്കാണ് തിരിഞ്ഞു നോക്കിയത്. അങ്ങിനെ ഏതാനും വര്‍ഷങ്ങള്‍ക്ക് മുമ്പുള്ള ഒരു സംഭവത്തിലേക്ക്  ഞാന്‍ എത്തി.  അന്നൊരു ഞായറാഴ്ച ആയിരുന്നു. അന്ന് ഞായറാഴ്ച കല്യാണങ്ങളുടെ ദിവസമായിരുന്നു. ( ഇന്ന് ഓഡിറ്റോറിയത്തിനു എന്ന് ഒഴിവുണ്ടോ അന്ന് കല്യാണം.)  അങ്ങിനെ കല്യാണത്തിനു പോയി (പ്രത്യേകം ക്ഷണിച്ചിട്ടു തന്നെയാ പോയത് ) വയറു നിറച്ചും പിന്നെ കുറച്ചും ബീഫ്‌ ബിരിയാണി കുത്തിക്കയറ്റി കടയില്‍ വന്നു അകത്തു സ്ഥലം ബാകിയുണ്ടോ എന്നറിയാന്‍ ഒരു നാരങ്ങ സോഡയും കുടിച്ചു. ഞായറാഴ്ച ആയതിനാല്‍ വിജനമായ ആ അങ്ങാടിയില്‍ അടച്ചിട്ട ഒരു കടക്കു മുന്നില്‍ ഞാനും കൂട്ടുകാരും ഇരുന്നു അല്പനേരം സംസാരിച്ചിരുന്നു ( ഫുള്‍ ടാങ്ക് ആയതിനാല്‍ നടക്കാന്‍ വയ്യ. അതാണ്‌ യാഥാര്‍ത്ഥ്യം.)  വെയിലൊന്നു കുറഞ്ഞപ്പോള്‍ (വയറൊന്ന് അയഞ്ഞപ്പോള്‍..എന്ന് സാരം..) ഞങ്ങള്‍ പലവഴിക്കായി പിരിഞ്ഞു. എന്നാല്‍ ഒരാള്‍ എന്റെ കൂടെ ഉണ്ടായിരുന്നു, എന്നെക്കാള്‍ രണ്ടു വയസ്സ് കൂടുതലുണ്ട് ആ കൂട്ടുകാരന്. ഞങ്ങള്‍ ഒന്ന് ചുറ്റി നടക്കാന്‍ തന്നെ തീരുമാനിച്ചു, അടുത്തുള്ള ടിപ്പു സുല്‍ത്താന്‍ റോട്ടിലൂടെ നടന്ന് കുറച്ച് അകലെയുള്ള ഒരു മൈതാനത്തിനടുത്തെത്തി.അവിടെ കുറച്ച് കുട്ടികള്‍ വട്ടം കൂടി നില്‍ക്കുന്നതു കണ്ടു. അവര്‍ എന്തോ കളിക്കാനുള്ള പരിപാടിയാണ് എന്ന് മനസിലാക്കിയ ഞാന്‍ കൂട്ടുകാരനോട്., “നകുക്ക്‌ അല്‍പനേരം ഇവരുടെ കളി കണ്ടിരുന്നാലോ” ( സത്യത്തില്‍ വടന്നു ക്ഷീണിച്ചിട്ടുണ്ടായിരുന്നു, അത് പുറത്തു അറയിച്ചില്ല എന്ന് മാത്രം ) അവന്റെ സമ്മതം കിട്ടിയതും ഞങ്ങള്‍ മൈതാനത്തിലേക്ക് ചെന്ന് ഒരു തണലില്‍ ഇരുന്നു, ഇതേ സമയം അവിടെ മുതിര്‍ന്ന രണ്ടു  കുട്ടികളായ ( യു.കെ.ജി കുട്ടികള്‍ അല്ല കേട്ടോ ഹൈ സ്കൂള്‍ വിദ്യാര്‍ത്ഥികളാണ് ) സൈതും യൂസഫും  തങ്ങളുടെ ടീം അംഗങ്ങളെ തിരഞ്ഞെടുക്കുന്ന തിരക്കിലാണ്, ഇതിനിടയില്‍ സൈത് ഞങ്ങളെ ശ്രദ്ധിക്കുകയും ഇന്ന്

“കാക്കുമാരെ”(ഇക്ക എന്ന പ്രയോഗം മലപ്പുറം ജില്ലയില്‍ കാക്കു എന്ന് ഉപയോഗിക്കും) ടീമില്‍ ഇറക്കിയാലോ എന്ന് ചര്‍ച്ച ചെയ്യുകയും ചെയ്തു. അങ്ങിനെ ഞങ്ങളെ ടീമില്‍ കളിക്കാന്‍ വിളിച്ചു, “കളി ക്രിക്കറ്റ്‌”

     ടീമിലേക്ക് ആളെ ക്ഷണിക്കുന്ന അടുത്ത ഊഴം സൈതിന്റെതായിരുന്നു. അവന്‍ വലിയ ആളില്‍ നിന്നും നല്ലൊരു പെര്‍ഫോമന്‍സ് പ്രതീക്ഷതിനാല്‍ എന്നെ മാറ്റി നിര്‍ത്തി, കൂട്ടുകാരനെ വിളിച്ചു, യൂസഫ്‌ എന്നെയും ടീമില്‍ വിളിച്ചു, അങ്ങിനെ കളി തുടങ്ങി. സൈതിന്റെ ടീമിനായിരുന്നു ആദ്യ ബാറ്റിംഗ്, എന്നാല്‍ ഞങ്ങളെ രണ്ടു പേരെയും യൂസഫിന് ചെറിയൊരു ധാരണ ഉണ്ടായിരുന്നത് കൊണ്ട് ശ്രദ്ധയോടെ കരു നീക്കി, മറിച്ച് സൈതാവട്ടെ വലിയൊരു പ്ലയറെ കിട്ടിയ സമാധാനത്തില്‍ അവനെ തന്നെ ആദ്യം ബാറ്റ്‌ കൊടുത്ത് പിച്ചില്‍ ഇറക്കി, കുറുക്കന് ആമയെ കിട്ടിയ പോലെ എന്ന മട്ടില്‍ എന്നെ നോക്കി ചിരിച്ചുകൊണ്ട് അവന്‍ പറഞ്ഞു, “ ആദ്യമായി ഞാന്‍ ക്രിക്കറ്റ്‌ ബാറ്റ്‌ തൊട്ടു..” അവന്‍റെ കളിയുടെ എക്സ്പീരിയന്‍സ്‌ കൂട്ടുകാര്‍ക്ക് ഇപ്പോഴേ മനസിലായല്ലോ.... ഞങ്ങളുടെ ടീമിലെ നല്ല ബൌളറെ തന്നെ ആദ്യം ഇറക്കി, അവന്‍ ഫസ്റ്റ് ബോള്‍ എറിഞ്ഞതും, സ്റ്റെമ്പ്‌ മൂന്നും തെറിച്ചത് ഒരുമിച്ചായിരുന്നു, അവന്‍ പഴയ തണലില്‍ തന്നെ സ്ഥാനം പിടിച്ചു,  അങ്ങിനെ ഒരു ടീം കഴിഞ്ഞു ഞങ്ങളുടെ ബാറ്റിംഗ്  തുടങ്ങി, എന്നെ ആദ്യം ഒന്നും ഇറക്കിയില്ല അവര്‍ ഏറെക്കുറെ റണ്സ് എടുത്തതിനു ശേഷം എന്നെ ഇറക്കി, ഞാന്‍ ബാറ്റും പിടിച്ചു സ്റ്റെമ്പിനടുത്തെത്തി കുട്ടികളുടെ ഇടയില്‍ മാനം കളയില്ല എന്ന ഉറച്ച പ്രതിജ്ഞയോടെ സ്റ്റെമ്പിനു നേരെ ചീറി വരുന്ന പന്ത് ലക്‌ഷ്യം വെച്ച് ബാറ്റു ആഞ്ഞു വീശി. പറന്നുയരുന്ന പന്തിനെ കണ്ടു ഞാന്‍ സമാധാനിച്ചു, പന്ത് തെറിച്ചു വീണത്‌ മൈതാനവും അടുത്തുള്ള റോഡും കഴിഞ്ഞു അടുത്തുള്ള റബര്‍ തോട്ടത്തില്‍... കൂടുകാരനെ നോക്കി കളിയാക്കുന്ന മട്ടില്‍ ഞാന്‍ പറഞ്ഞു “നോക്കെടാ ഇതാണ് കളി, ഇത് സിക്സ് അല്ല റ്റൊന്‍ഡി സിക്സാ”.. തിരിച്ചു അവന്‍ എന്നെ നോക്കി മനസ്സില്‍ എന്തോ മന്ത്രിക്കുന്ന പോലെ, ഞാന്‍ ഊഹിച്ചു, “പഹയാ നീ നൂറല്ല,  ഇരുനൂറാ” എന്നാവും എന്ന്, ഞാന്‍ അവിടെ നിന്നു കൊണ്ട് സ്വപ്ന ലോകത്തേക്ക് ഒന്ന് പോയി, ഫൂട്ബാള്‍ കളിയില്‍ ആരെങ്കിലും ഗോള്‍ അടിച്ചാല്‍ അവനെ കേട്ടിപ്പിടിക്കാനും എടുത്തു തോളിലേറ്റാനും ഒക്കെ ആളുകള്‍ കൂടുന്ന ആ കാഴ്ച സ്വപ്നം കണ്ടു നില്‍ക്കെ ഇരു ടീം അംഗങ്ങളും കൂടി എന്‍റെ അടുത്തേക്കു വരുന്നത് കണ്ടു, എന്‍റെ സ്വപ്നം ഫലിച്ചു എന്ന നിലയില്‍ ഞാന്‍ ചിരിച്ചുകൊണ്ട് നില്‍ക്കവെ എതിര്‍ ടീം ക്യാപ്ടന്‍ ( സൈത്) വന്നു പറഞ്ഞു “താങ്ക്സ്”. പക്ഷെ ഉദ്ദേശം മറ്റൊന്നായിരുന്നു, മൈതാനത്തിന്‍റെ പുറത്തേക്ക് പന്ത് അടിച്ചാല്‍ എടുത്ത റണ്‍സില്‍ നിന്ന് രണ്ടു റണ്സ് കുറയ്ക്കും എന്ന് അവന്‍ പറഞ്ഞതും എന്‍റെ ടീം ക്യാപ്ടന്‍ അടക്കം എല്ലാവരും വന്നു പിന്നെ ഞങ്ങളോട് രണ്ടു പേരോടും അവര്‍  ശോ..!!! അതെനിക്ക് ഓര്‍ക്കാന്‍ പോലും വയ്യ, പക്ഷെ ഞങ്ങള്‍ വയസില്‍ മൂത്തവരായതു കൊണ്ട്  നോണ്‍ വെജിറ്റേറിയന്‍ (തെറി) പ്രയോഗിച്ചില്ല എന്ന് മാത്രം. കളിയില്‍ നിന്ന് എന്ന് മാത്രമല്ല മൈതാനത്തിന്‍റെ ചുറ്റുമതിലിനു പുറത്തു നിന്ന് കളി കണ്ടു പഠിക്കാനും പറഞ്ഞു ഓടിച്ചതാ... പിന്നീട് ഞങ്ങള്‍ വേറെ എന്ത് കളി കളിച്ചാലും ക്രിക്കറ്റ്‌ കളിച്ചിട്ടെ ഇല്ല.....